Opið verður fyrir umsóknir frá 1. desember 2025 til og með 31. janúar 2026. Inntökuferlið hefst svo í febrúar 2026. Brýnt er fyrir umsækjendum að kynna sér vel þau hæfisskilyrði sem gerð eru til umsækjenda áður en sótt er um í námið.

Isavia ANS annast rekstur íslensku flugleiðsöguþjónustunnar og er stærsti starfsvettvangur flugumferðarstjóra á Íslandi. Flugumferðarstjórar stýra flugumferð á flugvöllum á Íslandi og í íslenska flugstjórnarsvæðinu sem er eitt það stærsta í heiminum.

Isavia ANS hefur langa reynslu af þjálfun og menntun flugumferðarstjóra og er áætlað að þjálfa þurfi 6-8 nýja flugumferðarstjóra árlega en það getur þó verið breytilegt milli ára.

Til þess að hefja nám í flugumferðarstjórn þurfa einstaklingar:

• Að hafa lokið stúdentsprófi eða sambærilegu námi.
• Að vera orðnir 18 ára þegar námið hefst en æskilegast er að umsækjendur séu á aldrinum 18 – 35 ára.
• Tala og rita mjög góða íslensku og ensku. Viðkomandi þarf að ná að lágmarki CEFRL stigi B2.
• Að vera góðir í mannlegum samskiptum og starfa í hópi.
• Að vera sjálfstæðir í vinnubrögðum og eiga gott með að taka ákvarðanir.
• Að standast læknisskoðun og skimun fyrir geðvirk efni skv. reglugerðarkröfum um flugumferðarstjóra.

Með umsókn skal fylgja afrit af prófskírteini og einkunnum úr námi.

Hæfir umsækjendur verða boðaðir í inntökupróf sem reynir á ákveðna hæfni (t.d. ensku, reikning, þrautalausnir, rýmisgreind og margt fleira). Inntökuferlið í heild er margþætt og inniheldur m.a. próf, verkefni og viðtöl. Eftir hvert viðfangsefni er skorið niður þar til þeir umsækjendur sem boðið verður í nám er valdnir en gera má ráð fyrir því að ferlið taki nokkrar vikur.

Reglum um inntökupróf í nám í flugumferðarstjórn hjá Isavia ANS hefur verið breytt. Eingöngu má sækja um allt að þrisvar sinnum. Prófniðurstöður gilda í þrjú ár og ef umsækjandi sækir um aftur innan þess tíma, gilda fyrri niðurstöður og ekki þarf að taka prófin aftur.

Frekari upplýsingar um inntökuprófin má finna á heimasíðu Eurocontrol (Inntökupróf).

Skipulag náms

Nám hjá Isavia ANS í flugumferðarstjórn er frábrugðið flestu námi. Námið skiptist í þrjá hluta; grunnnám, áritunarnám og starfsþjálfun og stífar kröfur eru gerðar um námsárangur í hverjum hluta.

Grunnnám er kennt í staðnámi, byrjar að hausti og lýkur í desember. Grunnnámið samanstendur af námskeiðum um flugleiðsögu, veðurfræði, flugleiðsögukerfi, flugvélar, mannþáttafræði, lög flugleiðsögu, vinnuumhverfi flugumferðarstjóra og fleira.

Áritunarnám er kennt í staðnámi og samanstendur af fyrirlestrum og æfingum í flugstjórnarhermi. Einhver munur er á lengd námsins eftir því á hvaða starfsstöð viðkomandi er valinn á.

Starfsþjálfun tekur mislangan tíma eftir framvindu náms hvers nema en áætlað er að hún taki allt að 9 - 12 mánuði. Í starfsþjálfun fer nemi inn á vaktir á sinni starfsstöð og starfar undir handleiðslu reyndra flugumferðastjóra. Meðan á starfsþjálfun stendur eru reglulega gerð framfaramöt þar sem stífar kröfur eru um námsárangur. Á meðan nemi er í starfsþjálfun fær hann greiddan mánaðarlegan námsstyrk.

Áætlað er að nemar séu að ljúka náminu á u.þ.b. 2 árum.

Fyrir nánari upplýsingar og fyrirspurnir hafið samband við Auði Antonsdóttur í gegnum netfangið audur.antonsdottir@isavia.is